10:51 Թուրքիայում հայազգի գործիչը պատրաստվում է կուսակցություն ստեղծել. հարցազրույց | |
![]() Քրդական «Խաղաղություն եւ ժողովրդավարություն» (BDP) կուսակցությունը եւս մեծամասնական ընտրակարգով առաջադրել էր հայազգի թեկնածուի`կուսակցության անդամ հայազգի քաղաքագետ-գրող, Արդվինում ծնված Իսմեթ Շահինին (Ստամբուլի 2-րդ ընտրատարածք): 42-ամյա Շահինը, ինչպես ինքն ասաց, քաղաքականությամբ է զբաղվում շատ վաղ տարիքից, եւ իր հոդվածներում հիմնականում անդրադարձել է քրդական խնդիրներին: 90-ական թվականներին, երբ լուսաբանելիս է եղել քրդական խնդիրները, նրան մի քանի անգամ տուգանել են: Վերջին տարիներին Շահինը հանդես է գալիս ղարաբաղյան հարցի վերաբերյալ հրապարակումներով: Նախորդ տարի գիրք է հրատարակել` «Հակակապիտալիստական մանիֆեստ» անվամբ, այժմ էլ զբաղվում է Համշենի պատմությամբ, նաեւ համշենի բարբառի լեզվական առանձնահատկություններն է ուսումնասիրում: Ներկայումս աշխատում է մի գրքի վրա, որտեղ խոսվում է համաշխարհային տնտեսական ճգնաժամի առաջացրած աշխարհաքաղաքական հավասարակշռության փոփոխության մասին: Գրքում խոսվում է այն մասին, որ առաջիկա 10 տարում ամերիկյան հեգեմոնիային փոխարինելու է չինականը: Թե ինչո՞ւ հայազգի գործչի առաջադրումը կասեցվեց` news-ը փորձեց պարզել հենց Շահինից, ով այս օրերին Հայաստանում է: Որեւէ պատճառաբանություն, թե ինչու կասեցվեց իմ թեկնածության առաջադրումը, այդպես էլ չներկայացվեց իմ կուսակցության ղեկավարության կողմից: Բայց ես ենթադրում եմ, թե որն է այդ որոշման պատճառը. կարծում եմ, խուսափելով առաջադրել հայազգի թեկնածուների, քրդական կուսակցությունը փորձում է զերծ մնալ թուրքական խորհրդարանում խնդիրներ ունենալուց եւ իր պատգամավորների ուժերը կենտրոնացնել բացառապես քրդական խնդիրները վեր հանելու ուղղությամբ: Հայազգի թեկնածուներ չառաջադրելով, «Խաղաղություն եւ ժողովրդավարությունը» գուցե հույս ունի, որ դրա դիմաց թուրքական իշխանությունները կլուծեն քրդական խնդիրը: Ինչպե՞ս արձագանքեցիք Ձեզ` թեկնածու չառաջադրելու որոշմանը: Շատ պարզ. հրաժարական տվեցի`դուրս եկա կուսակցությունից: Հայտնի է, որ Դուք ձեր նախաձեռնությամբ փորձեցիք առաջադրվել նաեւ Ձեր ծննդավայրում`Համշենում, սակայն ինչ-որ բան էլի խանգարեց: Այո, նախընտրական գրավ պիտի մուծեի, սակայն անհրաժեշտ գումար չհավաքվեց: Նախընտրական գրավի չափը կազմում է մոտ 6 հազար դոլար: Չկարողացանք անհրաժեշտ գումարը հավաքել, քանի որ առաջադրման ժամկետի ավարտից մեկ օր առաջ սկսեցինք դրամահավաքը: Հավաքվեց ընդամենը 3 հազար դոլարի կարգի գումար ու փաստորեն, գումարի պատճառով դուրս մնացի ընտրապայքարից: Իսկ ի՞նչ կասեք մյուս հայազգի թեկնածուներին եւս ընտրություններում չառաջադրելու մասին: Իմ եւ մյուս հայազգի թեկնածուների առաջադրումները տարբերվում են նրանով, որ մյուսների անունները, որպես պոտենցիալ թեկնածուներ, ընդամենը շրջանառվում էին: Իսկ ինձ պաշտոնապես առաջադրել էին որպես թեկնածու: Ձեր հետագա անելիքների մասին ի՞նչ կասեք: Շարունակելու եք այսուհետ ե՞ւս քաղաքական գործունեություն ծավալել: Ես հասկացա, (BDP)-ն, որին անդամակցում էի, չի ուզում դառնալ համայն Թուրքիայի խնդիրներով զբաղվող կուսակցություն` իր ներուժը կենտրոնացնելով քրդական գործոնի վրա: Ուստի, մենք որոշել ենք ստեղծել նոր կուսակցություն, որը կընդունի սոցիալիստական գաղափարախոսության կողմնակից բոլոր մարդկանց` անկախ նրանց էթնիկ ծագումից, եւ կսպասարկի մեր հայացքներն ընդունող, Թուրքիայում ապրող բոլոր ազգերի ներկայացուցիչների խնդիրները եւ կպաշտպանի Թուրքիայում ապրող բոլոր հալածյալների իրավունքները: Իսկ դուք մտավախություն չունե՞ք, որ թուրքական իշխանությունները չեն գրանցի Ձեր կուսակցությունը կամ կխոչընդոտեն Ձեր գործունեությանը: Ոչ, մտավախություն չունեմ: Բոլորն էլ իրենց քաղաքական հայացքներին համարժեք` օրենքների շրջանակներում կարող են կուսակցություն ստեղծել: Բնական է, որ քաղաքական կուսակցությունների առաջ իշխանությունները պարբերաբար խոչընդոտներ են ստեղծում: Ընդդիմությունն էլ հենց նրա համար է, որ իր դեմ արգելքներ հարուցվեն: Կուզեի անդրադառնայիք նաեւ հայ-թուրքական գործընթացին: Ըստ Ձեզ`այն ներկայումս ի՞նչ փուլում է, գործընթաց, որպես այդպիսին կա՞, թե՞ այն մեռած է: Գործընթացն, անխոս, սառած վիճակում է, չկա, որպես այդպիսին: Պատճառն թուրք ազգայնականներն են, որոնք արգելակում են հայ-թուրքական հարաբերությունների կարգավորումը: Նրանք ազդում են թուրքական իշխանությունների վրա եւ պնդում, որ առանց ԼՂ հարցի կարգավորման հայ-թուրքական հարաբերությունների բարելավումը դժվար խնդիր է: Եթե թուրքական խորհրդարանում հայազգի պատգամավորներ լինեին, նրանք ամեն ինչ կանեին, որպեսզի հայ-թուրքական գործընթացը չպայմանավորվեր ԼՂ խնդրով: Կարծում եմ` նաեւ այդ է պատճառը, որ խոչընդոտեցին մեր մուտքը խորհրդարան: Ձեր խոսքից տպավորություն է ստեղծվում, որ հայ-թուրքական հարաբերություններին խոչընդոտում է ոչ այնքան Ցեղասպանության հարցը, որքան ԼՂ խնդիրը: Այսպես պատասխանեմ. ԼՂ խնդիրն ավելի առաջնային է: Եթե ԼՂ խնդիրը լուծվի, թուրք ազգայնականները, որոնք դրա հիման վրա են կառուցում իրենց քաղաքականությունը, կզրկվեն քաղաքականություն իրականացնելու իրենց «հողից»: Հարկ է նկատել, որ թուրքական իշխանությունները նույնպես ազգայնական են: Թուրքիայի կառավարությունը որեւէ շահ չունի Հայաստանից, իսկ Ադրբեջանից`ունի: Նրանց համար կապ չունի, թե այդտեղ թուրքե՞ր են ապրում, թե՞ այլազգիներ: Կարեւրն այն է, որ այդ երկրից նավթ ու գազ է հոսում:
Զրուցեց` Հեղինե Մանուկյանը news.am | |
|
Всего комментариев: 0 | |