14:44 Միայն Արցախն է իրավասու խոսել իր սահմանների վերաբերյալ | |
Հայաստանի Հանրապետությունը պետք է այսօր բոլոր քայլերը ձեռնարկի, որ ԼՂՀ-ն դառնա բանակցային կողմ, այսօր ասուլիսի ժամանակ հայտարարեց ԵԽԽՎ-ում Հայաստանի պատվիրակության անդամ, ԱԺ «Ժառանգություն» խմբակցության պատգամավոր Զարուհի Փոստանջյանը: Խոսելով ԵԽԽՎ-ում ԼՂ հարցով ենթահանձնաժողովի վերաբացման վերաբերյալ` նա խիստ կարևորեց Արցախի Հանրապետության անմիջական ներկայացուցիչների մասնակցությունը ենթահանձնաժողովի աշխատանքներին, շեշտելով, որ ոչ ոք իրավասու չէ լուծել Լեռնային Ղարաբաղի ճակատագիրը ոչ միայն ԵԽԽՎ-ում, այլ նաև ԵԱՀԿ բանակցային գործընթացում: «Մենք այսօր խնդիր ունենք, որ Արցախի Հանրապետությունը դառնա բանակցային կողմ, և այդ խնդիրը պետք է լուծեն միայն ԼՂՀ ներկայացուցիչները: Ոչ ոք իրավասու չէ խոսել սահմանների կամ կարգավիճակի վերաբերյալ` նույնիսկ Հայաստանի Հանրապետության անունից: Արցախն առանձին անկախ պետություն է, որը ձևավորվել է նույն ժամանակ, ինչ Հայաստանի Հանրապետությունը` նույն օրենքի հիման վրա», - նշեց Զ.Փոստանջյանը: Ըստ բանախոսի` Հայաստանը պետք է օր առաջ ճանաչի Արցախի Հանրապետությունը, ինչը, նրա խոսքով, կլինի ՀՀ արտաքին դիվանագիտության լավագույն քայլը: Փոստանջյանը նաև հիշեցրեց, որ զինադադարի համաձայնագրի տակ դրված է նաև ԼՂՀ ներկայացուցչի ստորագրությունը: Պատասխանելով լրագրողների հարցին, թե արդյոք կարո՞ղ է ԵԽԽՎ-ում ԼՂ հարցով ենթահանձնաժողովը խոչընդոտել բանակցային գործընթացին` Զ.Փոստանջյանը նշեց, որ այս պահին դրա մասին դեռ դժվար է ասել: «Ադրբեջնա-թուրքական տանդեմի նպատակը հենց այն է, որ ԵԱՀԿ Մինսկի խմբից ԼՂ կարգավորումը մեկ այլ ձևաչափ տանեն և կորզեն որևէ ադրբեջանամետ փաստաթուղթ, իսկ մենք պետք է ձախողենք դա», - ասաց ԵԽԽՎ պատվիրակը` հիշեցնելով, որ Եվրոպայի Խորհրդում թուրք-ադրբեջանական տանդեմին արդեն հաջողվեց անցկացնել թիվ 1416 հակահայկական բանաձևը: Պատգամավորը նաև նկատեց, որ ի տարբերություն ԵԱՀԿ Մինսկի խմբի, որտեղ որոշումները միայն կոնսենսուսի հիման վրա են ընդունվում, ԵԽԽՎ այս ենթահանձնաժողովում հարցերը լուծվում են ձայների պարզ մեծամասնությամբ: aysor.am
| |
|
Всего комментариев: 0 | |