10:27 Հունաստանի ցամաքային զորքերի գլխավոր շտաբի պետի այցը Հայաստան | |
Օգոստոսի 23-25-ը աշխատանքային այցով Հայաստան էր գտնվում Հունաստանի ցամաքային զորքերի գլխավոր շտաբի պետ, գեներալ-լեյտենանտ Ֆրանգոս Ֆրանգուլիսի գլխավորած պատվիրակությունը:   Պատվիրակության անդամներին օգոստոսի 24-ին ընդունել է ՀՀ ԶՈՒ գլխավոր շտաբի պետ, գեներալ-գնդապետ Յուրի Խաչատուրովը: Հանդիպման ընթացքում ՀՀ ԶՈՒ ԳՇ պետը համառոտ ներկայացրել է ՀՀ զինված ուժերի կառուցվածքը, իրականացվող բարեփոխումները, տարածաշրջանի ռազմաքաղաքական իրավիճակը: Անդրադառնալով երկկողմ ռազմական համագործակցությանը՝ ՀՀ ԶՈւ ԳՇ պետը նշել է, որ Հունաստանը Հայաստանի ռազմավարական գործընկերներից մեկն է և երկու երկրների ռազմական ու ռազմաքաղաքական կապերը գտնվում են բարձր մակարդակի վրա: Հունական կողմը հանդիպման ընթացքում պատրաստակամություն է հայտնել շարունակել աջակցությունը ՀՀ խաղաղապահ կարողությունների ընդլայնման և անձնակազմի տեխնիկական հագեցվածության հարցում:  Նույն օրը Հունաստանի ցամաքային զորքերի գլխավոր շտաբի պետ, գեներալ-լեյտենանտ Ֆրանգոս Ֆրանգուլիսի գլխավորած պատվիրակությանն ընդունել է ՀՀ պաշտպանության նախարար Սեյրան Օհանյանը: Հանդիպմանը մասնակցել են նաև ՀՀ–ում Հունաստանի գործերի ժամանակավոր հավատարմատարը և դեսպանության ռազմական կցորդը: Զրույցի ընթացքում բարձր գնահատելով Հայաստանի և Հունաստանի ռազմական և ռազմաքաղաքական համագործակցությունը, Ս. Օհանյանը կարևորել է երկու երկրների համագործակցությունը կրթության, ռազմական բժշկության, հետախուզության և խաղաղապահության բնագավառներում: Եվրոպական մերձեցման իր քաղաքականության մեջ Հունաստանը Հայաստանի առաջնային գործընկերներից է, և այս առումով Հայաստանի համար ռազմավարական նշանակություն ունի համագործակցության զարգացումն ինչպես ռազմական-ռազմաքաղաքական, անվտանգության, այնպես էլ տնտեսական, մշակութային և այլ բնագավառներում: Բացի այդ, Հայաստանի համար Հունաստանի հետ հարաբերությունները կարևորվում են նաև ՆԱՏՕ-ի հետ համագործակցության շրջանակներում: Ս.Օհանյանը ողջունել է երկու երկրների՝ 1993թ.-ին սկզբնավորված համագործակցության շարունակական ընդլայնման ուղիով ընթանալու հանգամանքը, նշելով, որ հատկապես վերջին տարիներին երկու երկրների ռազմական համագործակցությունն ընդգրկել է այնպիսի տարրեր, որոնք կիրառելի են փոխգործակցության մեծ հնարավորություններ ունեցող զինված ուժերի համար: Հունաստանի ցամաքային զորքերի գլխավոր շտաբի պետ, գեներալ-լեյտենանտ Ֆրանգոս Ֆրանգուլիսի գլխավորած պատվիրակության անդամներն այցելել են ՀՀ ՊՆ կադրերի և ռազմական կրթության վարչության հունարեն լեզվի ուսուցման կենտրոն, ծանոթացել են կենտրոնի ուսումնական ծրագրերին և տեխնիկական հագեցվածության մակարդակին: Այցի շրջանակներում հունական պատվիրակությունը եղել է նաև ՀՀ ՊՆ հատուկ նշանակության բրիգադում, որտեղ ցուցադրվել են հատուկ նշանակության զորքերի գործողություններին առնչվող մի շարք հնարքներ:    Երևան կատարած այցի ընթացքում Հունաստանի ցամաքային զորքերի գլխավոր շտաբի պետ, գեներալ-լեյտենանտ Ֆրանգոս Ֆրանգուլիսի գլխավորած պատվիրակության անդամներն այցելել են Ծիծեռնակաբերդ հուշահամալիր, հարգանքի տուրք են մատուցել Հայոց ցեղասպանության զոհերի հիշատակին: ՀՀ ՊՆ տեղեկատվության և հասարակայնության հետ կապերի վարչություն | |
|
| |
| Всего комментариев: 1 | |
|
| |
