21:49 Չինաստանի արտգործնախարարը հեռանկարային է համարում Հայաստանի հետ համագործակցությունը | |
Երեւանում գտնվող Չինաստանի արտգործնախարար Յան Ձիեչին հայտարարեց, որ Չինաստանը շահագրգռված է Հայաստանի հետ բազմակողմանի համագործակցությամբ, որն ունի լուրջ ներուժ եւ հեռանկարներ: «Չինաստանի եւ Հայաստանի միջեւ դիվանագիտական հարաբերությունների գոյության 19 տարիների ընթացքում մեր հարաբերությունները աչքի են ընկնում հավասարությամբ եւ փոխադարձ աջակցությամբ: Այսօր Չինաստանը եւ Հայաստանը վստահելի բարեկամներ ու գործընկերներ են», - հինգշաբթի օրը հայտարարեց Յան Ձիեչին Հայաստանի արտաքին գործերի նախարար Էդվարդ Նալբանդյանի հետ բանակցությունների ավարտին կայացած ճեպազրույցում: Սա նման բարձ մակարդակով չինացի պաշտոնյանի առաջին այցն էր Հայաստան: Նախարար Էդվարդ Նալբանդյանի խոսքով` Չինաստանի արտգործնախարի այցը վկայում է երկու երկրների հարաբերությունների զարգացման մակարդակի մասին: Ըստ Նալբանդյանի` այսօր հանգամանալից քննարկվել են համագործակցության ոլորտների ընդարձակման, այդ թվում` էներգետիկայի, հանքարդյունաբերության, տրանսպորտի, առողջապահության եւ այլ բնագավառներում փոխգործակցության խթանման հարցերը: Բանակցությունների ընթացքում, ըստ նախարարների, կարեւոր տեղ է հատկացվել երկկողմ առեւտրատնտեսական հարաբերությունների հետագա զարգացմանը: Չինաստանը, որի տնտեսությունը ներկայումս երկրորդն է աշխարհում, Հայաստանի երկրորդ խոշորագույն առեւտրական գործընկերն է Ռուսաստանից հետո: 2009-ի համեմատ` երկու երկրների միջեւ ապրանքաշրջանառությունը անցած տարի ավելացել է գրեթե 50 տոկոսով եւ կազմել շուրջ 438 միլիոն դոլար: Հայաստանը արտահանել է 62, ներմուծել` 376 միլիոն դոլարի ապրանք: «Երկկողմ տնտեսական կապերի զարգացման կարեւոր վկայություն է Չինաստանի Շանսի նահանգում Հայաստանի նախագահի ներկայությամբ հայ-չինական «Շանսի-Նաիրիտ» համատեղ ձեռնարկության գործարկումը, Հայաստանում Չինաստանի կողմից իրականացվող տնտեսական ծրագրերը, ՀԷԿ-երի կառուցումը, հեռահաղորդակցության բնագավառում համագործակցությունը», - շեշտեց Էդվարդ Նալբանդյանը: Անցած տարվա սեպտեմբերին Հայաստանի վարչապետ Տիգրան Սարգսյանի Չինաստան կատարած այցից հետո կողմերը բանակցություններ են վարում Իրան-Հայաստան երկաթուղու կառուցման նպատակով Հայաստանին 1 միլիարդ դոլարի վարկ տրամադրելու շուրջ: «[Վարկը] դեռ չկա, բայց նման բանակցություններ ընթանում են», - «Ազատություն» ռադիոկայանին փոխանցեց վարչապետի եղբայրը` Չինաստանում Հայաստանի դեսպան Արմեն Սարգսյանը` հավելելով, որ չի կարող ասել, թե կոնկրետ երբ կտրամադրվի վարկը: Բանակցությունների ընթացքում երկու նախարարները անդրադարձել են նաեւ գլոբալ եւ տարածաշրջանային զարգացումներին: «Խոսեցինք Ղարաբաղյան հիմնախնդրի կարգավորման գործընթացի շուրջ, եւ այս ենթատեքստում Հայաստանը հայտնեց իր շնորհակալությունը եւ գնահատականը Չինաստանի հավասարակշռված դիրքորոշմանը Հայաստանի համար կարեւորագույն հարցերում: Հայաստանն իր հերթին վերահաստատեց մեկ Չինաստանի վերաբերյալ իր ավանդականը դիրքորոշումը», - ասաց Հայաստանի արտգործնախարարը: Չինաստանի արտաքին գերատեսչության ղեկավարն էլ ասաց, թե ինքը կրկին «վերահստատել է Չինաստանի պաշտոնական դիրքորոշումը զգայուն տարածաշրջանային հարցերի վերաբերյալ»: «Մենք հուսով ենք, որ համապատասխան հարցերը ամեն դեպքում կարգավորվելու են շահագրգիռ կողմերի միջեւ երկխոսության եւ կոնսուլտացիաների միջոցով: Իմ հայ գործընկերոջ հետ համակարծիք ենք, որ այս նպատակին հասնելու համար համապատասխան կողմերն ունեն բավարար քաղաքական խոհեմություն եւ համբերություն: Մենք ելնում ենք նրանից, որ սա ոչ միայն բխում է հակամարտող կողմերի արմատական շահերից, այլեւ նպաստելու է տարածաշրջանային խաղաղությանը, կայունությանն ու զարգացմանը», - ասաց Յան Ձիեչին: azatutyun.am
| |
|
Всего комментариев: 0 | |