Թուրքական «Հաբերգեջ» (Habergec) տեղեկատվական կայքը հայտնում է, որ Աղթամարի Սուրբ Խաչ հայկական եկեղեցու գմբեթը սեպտեմբերի 19-ին անխաչ թողնելու մասին նահանգապետի հայտարարությունից հետո բազմաթիվ հայերի հրաժարումը Վան ժամանելուց տագնապեցրել է Վանի թուրք գործարարներին:
95 տարի հետո, երբ առաջին անգամ կազմակերպվելու է կրոնական արարողություն հայկական այդ պատմական եկեղեցում: Բացառիկ նշանակության այդ իրադարձությունն ապահովելու էր բազմահազար հայերի ժամանումը Վան զբոսաշրջիկի կարգավիճակով: Թուրք գործարարների համոզմամբ` դա խթանելու էր Հայաստանի հետ առևտրատնտեսական հարաբերությունների զարգացմանը: Իսկ ահա խաչը չտեղադրելու հետ կապված վերջին դժգոհության ալիքը արդեն հարցականի տակ է առել Վանի գործարարների այդ ակնկալիքները: Նրանք խոստացել են ամեն գնով լուծել գմբեթին խաչի տեղադրման խնդիրը:
«Մեր խոսքը խոսք է: Նահանգապետարանը հայտարարել է, տեխնիկական պատճառներով հնարավոր չի լինի մոտ օրերս խաչը տեղադրել գմբեթին: Իսկ մենք ասում ենք, որ դա ինքներս կանենք: Մենք չենք ցանկանում, որ նույնիսկ մեկ հայ չեղյալ հայտարարի իր գալուստը»,- ասել է Վանի առևտրա-արդյունաբերության պալատի (VATSO) նախագահ Զահիր Քանդաշօղլուն:
Նշվում է, որ Վանի իջևանատներում նախապես համարներ պատվիրած 250 հայերից բաղկացած մի խումբ արդեն չեղյալ է հայտարարել իր պատվերը և հրաժարվել Վան մեկնելուց: Թուրք գործարարներն անհանգստացած են հատկապես Մայր Աթոռ Սուրբ Էջմիածնի հայտարարությունից, ըստ որի, հայ հոգևորականները հրաժարվում են ժամանել Աղթամար, եթե եկեղեցու գմբեթին խաչ չկա: Նշվում է, որ Սբ. Էջմիածինը համայն հայութան հոգևոր կենտրոնն է, և նրա այդ հայտարարությունը կարող է կանխել բազմաթիվ հայերի ժամանումը Վան: