18:20 Կոմանդոսը Սեյրան Օհանյանի մասին. Ձիերին ընթացքի ժամանակ չեն փոխում | |
Վերջին շրջանում հայկական զինված ուժերում արձանագրվող արյունալի դեպքերի մասին NEWS.amը զրուցել է արցախյան պատերազմի մասնակից գեներալ-մայոր Արկադի Տեր-Թադեւոսյանի հետ: Պարոն Տեր Թադեւոսյան, հայկական բանակում վերջերս հաճախակիացել են սպանության դեպքերը, ի հայտ են գալիս բանակի ներքին խոհանոցին վերաբերող նորանոր հանցավոր երեւույթներ: Շատերի դիտարկմամբ Պնախարար Սեյրան Օհանյանը չի կարողանում վերահսկել բանակում տիրող իրավիճակը, հետեւապես պետք է հեռանա պաշտոնից: Դուք կիսո՞ւմ եք այդ կարծիքը: Ես չեմ կարծում, որ նման դժվար իրավիճակում պետք է պահանջել նախարարի հրաժարականը: Ինչպես ասում են՝ ձիերին ընթացքի ժամանակ չեն փոխում: Սեյրան Օհանյանն անցել է պատերազմի դժվարին դպրոց եւ նա ունակ է հաղթահարել այն իրավիճակը, որն ի հայտ է եկել հայկական բանակում: Պաշտպանության համակարգում մասնակի փոփոխություններն ընդունելի կլինեն, սակայն բանը չպետք է հասնի նախարարի փոփոխությանը: Իսկ եթե Ձեզ առաջարկ արվի ստանձնել Պնախարարի պաշտոնը, Դուք կհամաձայնե՞ք: Ոչ, ես չեմ ընդունի այդ առաջարկը, նախ՝ տարիքից ելնելով, եւ բացի այդ աշխատունակությունս հաշվի առնելով: Նախարարի պաշտոնն ահռելի, ոչ նորմավորված աշխատանք է պահանջում: Ես աշխատել եմ պաշտպանության համակարգում եւ գիտեմ, թե ինչ է իրենից ներկայացնում նախարարի պաշտոնը: Ես հաստատ չեմ կարող նման պաշտոն ստանձնել: Ես ինձ տեսնում եմ հասարակական ոլորտում, եւ ցանկանում եմ հասարակական իմ գործունեությամբ աջակցել բանակին, վեր հանել առկա խնդիրներն ու դրանց լուծման բանալիները գտնել: Անշուշտ, հասարակության հետ մեկտեղ: Իսկ պրոֆեսիոնալ բանակին անցնելուն ինչպե՞ս եք վերաբերվում: Կարծում եք, այդ անցումը հնարավորություն կտա խուսափե՞լ այն իրավիճակից, որն առկա է ներկայիս բանակում: Հայաստանը ներկայումս չի կարող իրեն նման բան թույլ տալ: Եթե հզոր Ռուսաստանը չկարողացավ անցնել պրոֆեսիոնալ բանակի, ապա Հայաստանն առավել եւս: Պրոֆեսիոնալ բանակ ունենալու համար պետք է հարուստ երկիր լինես: Պրոֆեսիոնալ բանակը թեեւ թանկ, սակայն արժեքավոր բանակ է: Բայց հիմա դրա ժամանակը չէ, եւ նման բանակի անցնելու համար ժամանակ, ռեսուրսներ եւ կադրեր են պետք:
Զրուցեց Հեղինե Մանուկյանը NEWS.AM | |
|
Всего комментариев: 0 | |