00:36 Հրանուշ Խառատյան. Ադրբեջանում վտանգված է Կովկասի համար շատ կարևոր դեր խաղացած էթնիկ խմբերի գոյությունը | |
Ադրբեջանից փախստականների լիազոր ներկայացուցիչները նամակով դիմել են ՄԱԿ-ի գլխավոր քարտուղար Պան Գի Մունին` կոչ անելով ուշադրություն դարձնել Ադրբեջանի ազգային փոքրամասնությունների խնդիրներին: Այս մասին այսօր կայացած ասուլիսում հայտնեց Ադրբեջանահայության կազմկոմիտեի անդամ Մարիամ Ավագյանը: Նրա խոսքերով, ադրբեջանահայերը սերտ կապի մեջ են գտնվում Ադրբեջանի փախստական ազգային փոքրամասնությունների հետ և նրանց միանալով` ցանկանում են ՄԱԿ-ի, ինչպես նաև այլ միջազգային կառույցների ուշադրությունը սևեռել Ադրբեջանում տեղի ունեցող ոչ մարդկային իրադարձություններին: «Ադրբեջանը դարձել է սպանդի, ոճրագործության, ցեղասպանության տարածք: Այնտեղ տիրում է թշնամանք և ատելություն»,- ասաց Մ.Ավագյանը: ՄԱԿ-ին ուղղված դիմումում մասնավորապես ասված է. «Ձեզ են դիմում Կասպից Արևմուտքում պետականության կանոնակարգման` շուրջ 100 տարի շարունակաբար բռնկվող և առ այսօր մահ սփռող ճգնաժամի անմիջական զոհերը; Հակառակ Միավորված ազգերի ջանքերին, իրար հաջորդող Բաքվի վարչակարգերի հարուցած արյունալի բռնամիջոցները, պատերազմի և ցեղասպանության ակտերը հանգեցնում են նորանոր զոհերի Կասպից Արևմտյան շրջանում բնակվող միլիոնավոր մարդկանց շրջանում: Այդ մարդիկ ներկայացնում են տասնյակից ավելի ազգեր` լեզգիներ, ավարներ, ռուսներ, հայեր, հրեաներ, էթնիկ թուրքեր, թաթարներ, ուդիներ, թալիշներ, լաքեր, հույներ և այլն: Մեր կարծիքով, Կասպից Արևմուտքում լարվածության աճի պատճառներից են ՄԱԿ-ի ջանքերի անբավարարությունը և որոշակի անհավասարակշռությունը»,- նշված է դիմումում: «Բաքվի 1990թ.-ի հունվարյան դեպքերը, ուղղված էին ոչ միայն հայերի դեմ, այլև` այլ ազգերի դեմ: Այդ շրջանում ռուսալեզու փախստականները ևս ստիպված էին դուրս գալ: Իրականում այդ երևույթը այսօր էլ շարունակվում է` այն էլ չթաքնված ձևով»,- նշեց Հ.Խառատյանը: Ըստ նրա, Հայաստանը, Ադրբեջանը և Վրաստանը միացել են ԵԽ-ի ազգային փոքրամասնությունների իրավունքների պաշտպանության շրջանակային կոնվենցիային: Երեք տարին մեկ այդ երկրները պարտավոր են ներկայացնել իրենց երկրներում բնակվող ազգային փոքրամասնությունների նկատմամբ իրականցվող քաղաքականության մասին ցեկույց: Ըստ այդմ, Ադրբեջանը ներկայացրել է զեկույց, որի կեսը նվիրված է նրան, թե Միջագետքի քաղաքակրթությունը իրականում թուրքական քաղաքակրթություն է, որ 19-րդ դարում հայերը եկան և մահմեդականների ջարդեցին, գրավեցին նաև նրանց տարածքը: Այնուհետև, այդ կարգի հայտարարություններից հետո ներկայացվում են ազգային փոքրամասնությունների նկատմամբ իրականացված գործողությունները: Հ.Խառատյանը տեղեկացրեց, որ այսօր Ադրբեջանի տարածքում ապրում են ուդիները, որոնք համարվում են աղվանների միակ հետնորդները: Նրա խոսքով, ուդիները չափազանց բացառիկ ժողովուրդ են նաև Հարավային Կոկասի պատմության համար և այդ ժողովուրդն այսօր Ադրբեջանում գտնվում է ֆանտաստիկ ծանր պայմաններում: «Միթե միջազգային կառույցները չեն հասկանում, որ Ադրբեջանում վտանգված է Կովկասի համար շատ կարևոր դեր խաղացած էթնիկ խմբերի գոյությունը: Եվ եթե իրարի հետևից ընդունվող բազմաթիվ միջազգայնագրերը որևէ դեր չեն խաղում Ադրբեջանում, ապա մնում է մտածել, որ թե ԵԽ-ն, թե ԵԱՀԿՆ-ն, թե ՄԱԿ-ը հատուկ բարեհաճ վերաբերմունք ունեն մի երկրի հանդեպ, որտեղից ամենաֆաշիստական, ամենառասիստական, ամենաքրեական ձևով դուրս մղվեցին, ջարդվեցին, կոտորվեցին ադրբեջանահայերը, և այսօր այդ պրոցեսը շարունակվում է նաև այլ ժողովուրդների նկատմամբ: Ուստի նամակը ուղղված է նրան, որ ուշադրություն սևեռեն այս խնդիրների վրա»,- հայտնեց Հ.Խառատյանը: Ազգագրագետը միաժամանակ նշեց, որ ԵԱՀԿ-ն հատուկ ստեղծել է ազգային փոքրամասնությունների գծով գերագույն գլխավոր կոմիսարի պաշտոն, որի դերը հենց այսպիսի իրավիճակների միջամտելն է: Նշվեց նաև, որ ՄԱԿ-ը ընդունում է բանաձևեր` առանց հաշվի առնելու իրականությունը. ՄԱԿ-ում ոչ մի անգամ չի քննարկվել Ադրբեջանում փոքրամասնութունների նկատմամբ իրականցվող գործողությունները, սակայն, ՄԱԿ-ը պետք է հետևի այդ գործընթացներին և որոշ հավասարակշռություն ապահովի այդ երկրներում: «Կասկածում եմ, որ վաղը այս ասուլիսի հետքերով Ադրբեջանը կհայտարարի, որ իր երկրում փոքրամասնությունները հիանալի ապրում են: Այդ հայտարարույթունը կմարսվի, և ոչ մի փաստահավաք խումբ չի գնա պարզելու իրականությունը: Սա նշանակում է` համագործակցություն այսօր Ադրբեջանում իշխող կլանի հետ»,- ասաց Հ.Խառատյանը:
Աղբյուր` Panorama.am | |
|
Всего комментариев: 0 | |