10:53 Էրդողանի կուսակցությունը քաղաքական շոու է անվանում Անիի ավերակներում նամազ անելու Բահչելիի ցանկությունը | |
Իր կուսակիցների հետ Անիի ավերակներում նամազ անելու Թուրքիայի «Ազգայնական շարժում» ընդդիմադիր կուսակցության (ԱՇԿ) նախագահ Դևլեթ Բահչելիի ցանկությունը ոչ այլ ինչ է, եթե ոչ քաղաքական շոու: Այս մասին, թուրքական Cihan («Ջիհան») գործակալության փոխանցմամբ, հայտարարել է Թուրքիայի վարչապետ Ռեջեփ Թայիփ Էրդողանի գլխավորած «Արդարություն և զարգացում» իշխող կուսակցության (ԱԶԿ) պատգամավոր Մահմուդ Էսադ Գյուվենը: «ԱՇԿ-ի առաջնորդ Դևլեթ Բահչելին հայտարարում է, թե ի պատասխան Աղթամարի Սուրբ խաչ եկեղեցում մատուցված պատարագի պատրաստվում է նամազ անել Անիի ավերակներում: Դա կարող ենք որակել որպես քաղաքական շոու: Մինչ «Արդարություն և զարգացում» կուսակցության գործունեության շնորհիվ Թուրքիան նոր թափ է հավաքում, ԱՇԿ-ն տարված է պատրանքներով, ինչն էլ ցույց է տալիս, թե որքանով է այդ կուսակցությունը կարևորում Թուրքիայի խնդիրները»,- հայտարարել է Մահմուդ Էսադ Գյուվենը` հիշեցնելով Թուրքիայի Մշակույթի և զբոսաշրջության նախարար Էրթուղրուլ Գյունայի հայտարարությունը: «Մեր մշակույթի նախարար Էրթուղրուլ Գյունայն ասել է հետևյալը. «Նման վայրերում զանգվածային նամազ անելն օրինական չէ»: Իսկ ԱՇԿ-ն` որպես քաղաքական կուսակցություն, պետք է հարգի օրենքը»,- ասել է թուրք խորհրդարանականը: Հիշեցնենք, որ օրեր առաջ ԱՇԿ ընդդիմադիր կուսակցության նախագահ Դևլեթ Բահչելին հայտարարել էր, որ պատրաստվում է իր 40 կուսակիցների հետ, ի պատասխան Աղթամարի Սուրբ խաչ եկեղեցում մատուցված պատարագի, նամազ անել Ալփասլանի կողմից 1064թ. մզկիթի վերածված Անիի Մայր տաճարում: Tert.am | |
|
Всего комментариев: 0 | |