ՀԱՄԱԽՄԲՈՒՄ

Հայաստանի հավաքականի առաջատար խաղացող Հենրիխ Մխիթարյանն առաջին գնդակը խփեց Դոնեցկի «Շախտյորի» կազմում` աչքի ընկնելով Ուկրաինայի առաջնության 9-րդ տուրի «Տավրիայի» հետ մրցավեճում: Սեպտեմբերի 15-ին կայացած «Շախտյոր»-«Պարտիզան» Չեմպիոնների լիգայի մրցավեճին Մխիթարյանը հայտավորված չէր, և մտավախություն կար, որ Լուչեսկուն հայ ֆուտբոլիստին դեռ չի վստահում:

Ամեն ինչ իր տեղն ընկավ երեկ, երբ «Շախտյորը» սեփական հարկի տակ 4:1 հաշվով ջախջախեց «Տավրիային»: Մխիթարյանը մեկնարկային կազմում էր և մասնակցեց ողջ հանդիպմանը: Եթե նախորդ տուրում «Օբոլոնի» հետ կայացած խաղում Հենրիխն անհաջող հանդես եկավ և փոխարինվեց 2-րդ կեսում, ապա այս անգամ նա լավագույններից մեկն էր «հանքափորների» կազմում և 72-րդ րոպեին բավական գեղեցիկ գնդակ խփեց. Սռնայի փոխանցումից հետո Մխիթարյանը մեկ հպումով առաջ անցավ 2 պաշտպաններից և հայտնվելով մրցակցի տուգանայինում` գրավեց դարպասի հեռավոր անկյունը:

Ուկրաինայի ընթացիկ առաջնությունում Մխիթարյանը 4-րդ գնդակը խփեց: Նախորդ 3 դեպքերում Հենոն աչքի էր ընկել Դոնեցկի «Մետալուրգում», որտեղից «Շախտյոր» տեղափոխվեց օգոստոսի 30-ին:

«Շախտյորը» 25 միավորով շարունակում է գլխավորել մրցաշարային աղյուսակը: 23 միավորով 2-րդ տեղում է Կիևի «Դինամոն», որն այսօր հյուրընկալվելիս 2:1 հաշվով հաղթեց «Զարյային»: