00:13 «Սերժ Սարգսյանը թող սկսի իրենից» (ՏԵՍԱՆՅՈՒԹ) | |
Ես չեմ ասել, Ուլյանով Լենինն է ասել, որ երբ հեղափոխությունը արդյունք չի տալիս, ծնվում է տեռորը: Տեռորը դա պատճառ չի, դա հետեւանք է»,-այսօր լրագրողների հետ հանդիպման ժամանակ հայտարարեց երգիչ-երգահան Ռուբեն Հախվերդյանը: Երբ պայքարի օրինական ձեւերը չեն բերում փոփոխությունների, ծնվում են այլ ձեւեր, թեեւ Ռուբեն Հախվերդյանը կարծում է, որ կա ավելի քաղաքակիրթ ձեւ. «Սերժ Սարգսյանը անընդհատ ասում է սկսկենք սպիտակ էջից, թող ինքը սկսի իրենից»,-ասում է Հախվերդյանը, բայց նաեւ հավելում, թե ինչպես նա կարող է պայքարել կոռուպցիայի դեմ, եթե ինքը ամբողջովին դրա մեջ է: «Ժողովուրդը սոված է, ինքը բիզնեսներ ու շենքեր ա կառուցում, բա ամոթ չի»: Երգիչ-երգահան Դավիթ Ամալյանի կարծիքով, դավաճանության, կեղծիքի ու ստեղծված իրավիճակի նկատմամբ անհրաժեշտ է ուղղակի անտարբերություն, արհամարհանք. քանի որ, ինչպես բժշկության մեջ` քաղցկեղին չի կարելի ձեռք տալ, ավելի արագ է տարածվում: Նրա կարծիքով, Հայաստանին անհրաժեշտ է մշակութային հեղափոխություն, ինչի արդյունքում շատ հարցեր կլուծվեն: Նա նաեւ չի ընդունում վերջին օրերին «Տաշիր-2011» մրցանակաբաշխությունից հետո բարձրացած աղմուկը: «Շատ ավելի վատ բան է կատարվում, հոգեւորն են ոչնչացնում: Իսկ մինչեւ այդ ինչու չէին խոսում, չէին ասում` էս ինչ տեքստ ա, ինչ մեղեդի ա, եթեր պետք չի տալ, հենց նյութին կպան, մարդիկ զայրացան»: Բանախոսները համակարծիք էին, որ այսօր երկրում տիրող իրավիճակը չի նպաստում զարգացմանը: «Կորցրել ենք մարդու, հերոսի մեր չափանիշը: Այսօր բացի ազգային հերոսներից, մյուսներին չեն հիշում ընդհանրապես, մտավորականի չափանիշը պետք է անձնազոհությունը լինի»,-ասաց Դավիթ Ամալյանը, որին Ռուբեն Հախվերդյանը հավելեց, որ «տխմար աֆիշների վրա բանակ են գովերգում` իմ զենքը իմ դուդուկն է, կամ ես քեզ սիրում եմ` ով ա ում սիրում, ոնց ա սիրում, խմբակային սեր ա, թե ինչ ա: Փոխարենը կարող էին Լեոնիդ Ազգալդյանի, Մոնթեի, Դուշման Վարդանի նկարները դնեին, որ մեր երեխաներն էլ տեսնեին ու ոգեշնչվեին նրանցով»: Հախվերդյանի գնահատմամբ, այսօր ժողովրդի ցասումը զսպում են կեղծ հայտարարություններով, ասում են` եթե դուք ներսում համերաշխ չեղաք, պայքարեցիք, պահանջեցիք նախագահի հրաժարականը, ադրբեջանցիները կօգտվեն առիթից ու կհարձակվեն մեզ վրա, պատեազմը կվերսկսկվի: «Այնինչ, այդ ընթացքում իրենք շարունակում են կլպել ժողովրդին եւ ավելացնել իրենց գերշահույթները»: Հախվերդյանի խոսքով, մեր երկիրը վերջին տարիներին վերածվել է «ֆեոդալական գարշելի զուգարանի», այնինչ եթե կենդանի լինեին Մոնթեն եւ հայ ազգի մյուս արժանավոր զավակները, ապա նրանք կպայքարեին արատավոր մի շարք երեւույթների դեմ, ինչպես այսօր Ժիրայր Սեֆիլյանը։ Իսկ անդրադառնալով շոու բիզնեսի այսօրվա վիճակին եւ խորհրդային ժամանակների երգարվեստին` Ռուբեն Հախվերդյանը նկատեց, որ այն ժամանակ մեծ տեղ էր տրվում դասական արվեստին, նաեւ պրոպագանդվում էր ազգային մշակույթը. «Չի կարելի ամեն ինչը տեսնել սեւ կամ սպիտակ. Սովետը շատ դրական բաներ ուներ»,-ասաց Հախվերդյանն ու ավելացրեց, որ այն ժամանակ ավելի շատ էին կարդում, ավելի շատ էին լսում, ու եթե իրենց էլ ճնշել են` Վիսոցկուն` Ռուսաստանում, իրեն Հայաստանում, ապա դրա արդյունքում իրենց արմատն ավելի է խորացել: | |
|
Всего комментариев: 4 | ||||
|