14:28 Միշլին Քալմի-Ռեյ. «Հայ - թուրքական գործընթացը չի կարող կիսատ մնալ» | |
 Հայ - թուրքական հարաբերությունների կարգավորման գործընթացը չի կարող կիսատ մնալ, հայտարարել է Շվեյցարիայի նորընտիր փոխնախագահ, արտգործնախարար Միշլին Քալմի-Ռեյը Հայաստանի Ազգային ժողովի նախագահ Հովիկ Աբրահամյանի գլխավորած պատվիրակության հետ երեկ Ժնեւում կայացած հանդիպման ժամանակ:Նա հայտնել է, որ այժմ ընթանում են ակտիվ խորհրդակցություններ երկու կողմերի հետ, որպեսզի բարենպաստ պայմաններ ստեղծվեն գործընթացը շարունակելու համար: «Շվեյցարիան վճռական է գործընթացը առաջ մղելու հարցում», - ասել է Քալմի-Ռեյը, բարձր գհահատելով Հայաստանի նախագահի` հայ - թուրքական հարաբերությունների կարգավորմանն ուղղված քայլը եւ այն համարելով քաղաքական խիզախություն: Հովիկ Աբրահամյանը նշել է, որ Հայաստանը բարձր է գնահատում Շվեյցարիայի աջակցությունը հայ - թուրքական հարաբերությունների բնականոնացմանն ուղղված հայկական կողմի նախաձեռնությանը: Նա շեշտել է, որ թուրքական կողմը առաջ է քաշել մի շարք նախապայմաններ, որոնք անընդունելի են հայկական կողմի համար: Աբրահամյանը հիշեցրել է, որ հաշվի առնելով Թուրքիայի խորհրդարանում արձանագրությունների վավերացման անհարկի ձգձգումները` Հայաստանի նախագահը ետ կանչեց արձանագրությունները խորհրդարանի օրակարգից` պահպանելով, սակայն, արձանագրությունների տակ դրված հայկական կողմի ստորագրությունը եւ դրանով իսկ հարգելով միջնորդների բարձր հեղինակությունը: Հանդիպման մասնակիցները անդրադարձել են նաեւ Լեռնային Ղարաբաղի հիմնախնդրի կարգավորմանը` կարեւորելով հարցի խաղաղ բանակցային ճանապարհով լուծումը: Հայաստանի Ազգային ժողովի հասարակայնության հետ կապերի վարչության փոխանցմամբ` նույն օրը Հովիկ Աբրահամյանի գլխավորած պատվիրակությունը հանդիպումներ է ունեցել Շվեյցարիայի Պետությունների խորհրդի (Սենատ) նախագահ Էրիկա-Ֆորստեր Վանինիի եւ Ազգային խորհրդի նախագահ Պասկալ Բրուդերեր Ուիսի հետ, շրջայց է կատարել Շվեյցարիայի խորհրդարանի շենքում, մասնակցել երկու պալատների նիստերին: Հովիկ Աբրահամյանը գրառումներ է կատարել պատվավոր հյուրերի գրքում: Այցի ընթացքում հայաստանյան պատվիրակությանը ուղեկցում է Շվեյցարիայում Հայաստանի դեսպան Շառլ Ազնավուրը: azatutyun.am
| |
|
| |
| Всего комментариев: 0 | |
