ՀԱՄԱԽՄԲՈՒՄ

Ինչպես տեղեկացնում է թուրքական Milliyet-ը,  Էրզրումի վարչական 1-ին դատարանի նախագահ Մեհմեդ Հասքալայջը կարծես թե պատժվել է հայ-թուրքական արձանի քանդման որոշումը չեղյալ համարելու համար եւ տեղափոխվել Կայսերիի վարչական դատարան որպես դատարանի անդամ:

Էրզրումի շրջանային վարչական դատարանի անդամ Ահմեդ Դորմազը նշանակվել է Մեհմեդ Հասքալայջըի նախկին պաշտոնին` Էրզրումի վարչական 1-ին դատարանի նախագահ:  Էրզրումի շրջանային վարչական դատարանի մեկ այլ դատավոր Քեմալ Քուքուն էլ նշանակվել է Կոնիայի վարչական դատարանի նախագահը:

Թե Ահմեդ Դորմազը, թե Քեմալ Քուքուն այն դատավորն են, ովքեր աջակցել են, որ Կարսի հայ-թուրքական բարեկամությանը նվիրված հուշարձանի համար վերջնական քանդման որոշում կայացվի:

Նշենք, որ օրեր առաջ Էրզրումի վարչական  դատարանը բավարարել է Կարսի քաղաքապետի առարկությունը եւ դատարանի կողմից նախկինում ընդունած որոշումը չեղյալ համարել` թույլատրելով քանդել Կարսում գտնվող «Մարդկության հուշարձանը»:

NEWS.am-ը ավելի վաղ տեղեկացրել էր, որ Թուրքիայի վարչապետ Ռեջեփ Թայիփ Էրդողանը Կարս կատարած այցի ժամանակ «հրեշավոր» էր անվանել հայ-թուրքական բարեկամության նվիրված հուշարձանը եւ հրահանգել քանդել այն։

Կարսի նախկին քաղաքապետ Նաիֆ Ալիբեյօղլուն տարիներ առաջ նախաձեռնել էր հսկա արձանի ստեղծումը, որը պետք է խորհրդանշեր հայ-թուրքական բարեկամությունը եւ խաղաղությունը: Սակայն 2009-ին քաղաքապետի ընտրություններում նա պարտություն կրեց: Անավարտ արձանը  անորոշ  ճակատագրով տեղադրվեց Կարսի հին հայկական թաղամասին կից գտնվող բարձունքում։

Նաիֆ Ալիբեյօղլուն մի առիթով հայտարարել է, թե  հուշարձանի քանդումը կապված է մի խնդրանքի հետ։ «Այդ խնդրանքը՝ Ադրբեջանի նախագահ Իլհամ Ալիեւի խնդրանքն է։ Մենք էլ Ադրբեջանից նավթի, գազի կախվածություն ունենք։ Քանդման միակ պատճառը սա է»,-նշել է Ալիբեյօղլուն։

news.am